თემურ თათარაშვილის ცელქი და ჭკვიანი ოთხფეხა მეგობრები

ლირიკული სიმღერების უბადლო შემსრულებელს, ცნობილ მომღერალ თემურ თათარაშვილს ოჯახში თითქმის ყოველთვის ჰყავდა ოთხფეხა მეგობრები, სხვადასხვა ჯიშის ძაღლები. ისინი საინტერესო, თავისებურ თვისებებს ამჟღავნებდნენ.

დღესდღეობით თემურს ბოქსიორის ჯიშის ულამაზესი სამფერა ბეკი ჰყავს, რომელიც ადამიანების უსაზღვროდ მოყვარეა, მთელ ოჯახს ახალისებს და სადღეისო ყოფასაც ულამაზებს. მომღერალი საყვარელ ძაღლს ზრუნვას არ აკლებს, მაღალი კლასის სპეციალიზებული საკვებით კვებავს და, ყოველდღიურად, მნიშვნელოვანი “დესერტითაც” – ხაჭოთი ანებივრებს. თემური ფიქრობს, რომ ოთხფეხა არსებებთან მეგობრობა ადამიანს აკეთილშობილებს, მათ გვერდით გაზრდა კი მოზარდს ჰუმანურ თვისებებს უყალიბებს.

თემურ თათარაშვილი:

– ჩემი ბავშვობიდან მოყოლებული, ყოველთვის გვყავდა ოჯახში ძაღლი. ჩემი პირველი ძაღლი იყო გერმანული ნაგაზი, რომელიც, სამწუხაროდ, უცნობმა ადამიანებმა მომიწამლეს. მაშინ 9-10 წლისა ვიყავი. შემდეგ შოტლანდიური ნაგაზი – კოლი მომიყვანეს. დიდობაში კი ლაბრადორი მყავდა, 1 თვის ლეკვი ჩამოვიყვანე ისრაელიდან და 12 წელი იცხოვრა ჩვენთან. ასევე გვყავდა ირლანდიური სეტერი და კოკერ სპანიელი. ამჟამად ჩვენი სახლის ბინადარია ბოქსიორი, სახელად ბეკი.

– ოთხფეხა მეგობარი თუ გაგიშვილებიათ?

– მოსკოვში რომ ვცხოვრობდი, ჩემმა იქაურმა თანამშრომლებმა მაჩუქეს ბენგალური კატა. მოგეხსენებათ, ზოგადად ეს ჯიში ჯიქისებრი შეფერილობის, ლამაზი, ჭკვიანი, თუმცა ჯიუტი და ეშმაკია კატებს შორის, საკმაოდ დიდი იზრდება. მოსკოვში მარტო ვცხოვრობდი, მის მოვლასთან გამკლავება გამიჭირდა და თბილისში ერთ-ერთი ჩამოსვლის დროს ჩემს ბავშვობის მეგობარს, ვეტერინარ ნათია ბერიძეს ვაჩუქე. დღესაც მის სახლში ცხოვრობს. ცხოველი თუ გყავს, უნდა მოუარო, ბედის ანაბარა არ უნდა მიუშვა.

– თქვენს ძაღლს, ბოქსიორს, ოჯახში ვინუვლის?

– მთელი ოჯახი. ვასეირნებთ, ვკვებავთ. ახლაც გავასეირნე ეზოში, ძაღლთან ერთად თამაშობდა.

– სპეციალისტების ცნობით, კოვიდ-19-ით არ ინფიცირდებიან ძაღლები, თუმცა მათ იბეწვი შეიძლება აღმოჩნდეს ინფექციის გადამტანი, როგორ იცავთ უსაფრთხოებას ბეკის სეირნობისას და შინდაბრუნების შემდეგ?

– პატარა რომ იყოს, შინ გვეყოლებოდა, მაგრამ ამხელა ძაღლს სახლში ხომ ვერ გააჩერებ? ჩემი კორპუსის გვერდით ყოფილი სტადიონია და იქ გაგვყავს ოთხფეხა მეგობრები. სახლში დაბრუნების შემდეგ კი თათებს ვუწმენდ. სპეციალისტების რეკომენდაციას გავითვალისწინებ.

– რა სახასიათო თვისებებსა მჟღავნებს თქვენი ოთხფეხა მეგობარი, ბულდოგიბეკი?

– რაც მთავარია, აგრესიული არ არის. უსაზღვროდ კაცთმოყვარე და გულკეთილია, აბსოლუტურად ყველა უყვარს განურჩევლად: ადამიანი, ცხოველი, დიდი, პატარა, ქალი, კაცი… სიგიჟემდე უყვარს ბავშვები. ეზოში ბავშვის ხმას თუ გაიგებს, აღარაფერი აინტერესებს, მასთან უნდა. ჩემს შვილიშვილებთან დაჭერობანას თამაშობს სახლში, ძალიან უყვარს გასაბერი ბურთი, თავით თამაშობს. აქვს თავისი საყვარელი სათამაშოებიც, უყვარს გართობა, მხიარულია. ჩემი შვილიშვილი თომა 3 წლისაა და ბეკისთან ერთად ყირაზე გადადის, ძაღლს ზედ აწვება, კუდზე და ფეხზე ექაჩება… ასეთი ფორმით ეთამაშება. ბეკი იმდენად ბავშვის მოყვარეა, რომ ერთხელაც არ დაუღრენია, არ დაუყეფია მისთვის.

სახლში პატარა თუთიყუშიც გვყავს. ბეკის მასთან თამაში უყვარს. თუთიყუში რომ დაფრინავს, ბეკი დასდევს, თუმცა არ აზიანებს. მხოლოდ ერთხელ მოუწია თუთიყუშს კუდის მოძრობა, მაშინ პატარა იყო ძაღლი…

ბეკის ოჯახის ყველა წევრი თანაბრად უყვარს, მაგრამ განსაკუთრებით მაინც თომას და მარის (ჩემს ქალიშვილს) გამოარჩევს. ახტება, ეფერება, ლოკავს. ძალიან ალერსიანია. დედაჩემი რომ ტელევიზორს უყურებს, ბეკიც გვერდით უზის ხოლმე, წინა თათები აქვს ამოყოფილი სავარძელზე, უკანა თათები – ქვემოთ და ასე ეხუტება დედაჩემს. საოცარი სანახავია.

ფიზიკურადაც ლამაზია, ვეფხვისებრი, სამფერა: წითური, თეთრი, შავი. 1 მაისს უსრულდება 1 წელი.

– ცნობილია, რომ ფლორის წარმომადგენლებს, განსაკუთრებით ძაღლებს, აქვთ მძაფრი ინტუიცია. თუ გქონიათ შემთხვევა, როცა თქვენმა ოთხფეხა ბინადარმა იგრძნო მოსალოდნელი საფრთხე?

– ლაბრადორი იყო ძალიან გონიერი… ეს მოხდა მაშინ, როცა დამაკავეს… კომპიუტერთან ვიჯექი, მოვიდა, ფეხზე თავი დამადო და თვალებში მიყურებდა ღრმად ჩაფიქრებული. იმ წუთას ადამიანივით მეტყველი და გონიერი თვალები ჰქონდა, თითქოს რაღაცას გრძნობდა… ეს კადრი მეხსიერებიდან არ გადამდის.

– ყოველ ჯერზე სხვა და სხვა ჯიშის ძაღლები გყავდათ, რით განსხვავდებოდნენ ერთმანეთისგან?

– ლეკვობაში ბეკი და ლაბრადორი ერთი ჭკუის არიან, ლამის კედლებზე დადიან… ირლანდიური სეტერი გვყავდა საოცრად გონიერი. ლაბრადორი მარისთან ცხოვრობდა და დროდადრო ჩვენთან მოჰყავდა. თუ ლაბრადორი შეჭამდა ირლანდიური სეტერის ჯამიდან, სანამ არ გავრეცხავდით, სეტერი თავის ჯამს აღარ ეკარებოდა. ადამიანივით იყო. პურის ნაჭერს რომ მისცემდი, დაწვებოდა, თათებში მოიქცევდა და სხვა ძაღლებივით დიდ ლუკმებად კი არ მიირთევდა, არამედ პატარა ლუკმას მოაკვნეტდა ადამიანივით, კარგა ხანს ღეჭავდა და გადაყლაპავდა.

წვიმის დროს სიფრთხილეს იჩენდა, გარეთ გაიხედავდა, სიტუაციას შეაფასებდა, გამორიცხული იყო, გუბეში ფეხი ჩაედგა. მოგეხსენებათ, სეტერი მონადირე ძაღლია. მე არ ვნადირობ, ჩემს ბიჭს დაჰყავდა სანადიროდ. იქ ჭაობებსაც ლაშქრავდა, ისე დაჰქროდა, ყველაფერი ავიწყდებოდა. ეზოში კი გუბეშიც არ ჩაყოფდა ფეხს. თავისებური ძაღლი იყო, საოცრად სუფთა.

– მრავალი ჯიშის ძაღლიგყავდათ, თქვენს ხასიათთან ახლოს უფრო რომელი ჯიშია?

– ლაბრადორი. უჭკვიანესი ძაღლი იყო, “პროფესორივით”. ბეკი ჯერ პატარაა, იმედია, ესეც დაჭკვიანდება.

– ბეკის რით კვებავთ?

– სპეციალიზებულ საკვებს ვაძლევთ. გარდა ამისა, ყოველდღე 3 საათზე 1 შეკვრა 0 %-იან ხაჭოს მიირთმევს, დღე არ ჩაგვიგდია. მოგეხსენებათ, ხაჭო კალცის შემცველი პროდუქტია, ძვლებისთვისაა სასარგებლო.

– ცხოველთა დაცვის თემაზე რა შემთხვევა გახსენდებათ?

– ვეტერინარ ნათია ბერიძესთან ვიყავი კლინიკაში. დილის 10 საათი იყო. უცებ მოვიდა ქუჩის ძაღლი, დიდტანიანი. ნათიამ გასძახა თანამშრომლებს: ჩქარა, მოვიდნენო!.. გაუტანეს საჭმელი დიდი რაოდენობით. ვკითხე, ვისი ძაღლები არიან-მეთქი. ნათიამ მიპასუხა, ასე მოდიან და ვაჭმევთ ხოლმეო. ასეთი საქციელი მისაბაძია.

– პირადი გამოცდილებით, ცხოველთან ურთიერთობა ადამიანის განვითარებაზე რა სასიკეთო გავლენასახდენს?

– ბეკი იმიტომ მოვიყვანე სახლში, რომ თომა გაზრდილიყო ძაღლთან ერთად. თომა ძაღლს ადამიანივით ესიყვარულება, ეუბნება ხოლმე: “ჩემო დახატულო!” ძაღლის გვერდით გაზრდილ ბავშვს ჰუმანური თვისებები უყალიბდება. არ გახდება სასტიკი და აგრესიული, არასდროს იფიქრებს ცხოველის მიმართ მავნებლობაზე.

ავის მქმნელი ბავშვები ცხოველთან ერთად რომ გაზრდილიყვნენ, არასდროს იფიქრებდნენ ცხოველის წამებაზე და სხვა მსგავს ვანდალიზმზე, რაც, სამწუხაროდ, ჩვენს სინამდვილეში ხდება.

სმარტპეტი