„ მსურს, ოთხფეხა მეგობრებისთვის თავშესაფარი გავაკეთო“

ცნობილი მომღერალი თიკა ჯამბურია სახლში თეთრ ბულტერიერს ზრდის. ამ ჯიშის ძაღლი, გარდა იმისა, რომ შეუპოვარი მებრძოლია, შესანიშნავი sკომპანიონიც არის. ცნობილია, რომ თეთრი ბულტერიერი 1850 წელს ბირმინგემელმა კინოლოგმა ჯეიმს ჰინკსმა სხვადასხვა ჯიშის შერევით, ექსპერიმენტის შედეგად გამოიყვანა. ამ თეთრმა, კომპაქტური ზომის ძაღლმა დიდ ბრიტანეთში არისტოკრატთა გულები დაიპყრო. განსაკუთრებით პრესტიჟული გახდა ოქსფორდისა და კემბრიჯის სტუდენტებისთვის, როგორც ამბობენ, მოდურობა და აქტუალობა დღესაც არ დაუკარგავს… მოუსყიდველი, ბავშვების მოყვარული, საუკეთესო ვირთხამჭერი, ეგზოტიკური ექსტერიერი – ასე ახასიათებენ ამ ჯიშის ძაღლს სპეციალისტები. სავალდებულოდ მიაჩნიათ ადრეული ასაკიდანვე მისი თანმიმდევრული, სწორი წვრთნა.

თუ როგორ მოხვდა თეთრი ბულტერიერის ლეკვი თიკა ჯამბურიას ოჯახში, რა თავისებურება ახასიათებს, რა კეთილ თვისებებს ამჟღავნებს, არის თუ არა საშიში გარშემომყოფთათვის, როგორ წვრთნიან და უვლიან მას – ამ თემაზე თავად მომღერალი გვიამბობს. თიკა ფაუნის ბინადართა, განსაკუთრებით ძაღლების, ზედმიწევნით მოყვარული და ქომაგია.

– თიკა, გაიხსენეთ თქვენი პირველი შეხება შინაურ ცხოველებთან.

– 5-6 წლის ვიყავი, როცა მამამ პირველად მომიყვანა სახლში ოთხფეხა მეგობარი. ეს პატარა ტანის ჯიშის ძაღლი რამდენიმე წელი მყავდა. ძალიან მიყვარდა და ვუვლიდი. ფაბი ერქვა. მისი სიკვდილის შემდეგ ჯუჯა პუდელი მომიყვანეს, მასაც ფაბი დავარქვით. ბავშვობიდან მოყოლებული, ძაღლების მიმართ დიდი სიყვარული, განსაკუთრებული დამოკიდებულება მაქვს. შეიძლება ითქვას, ვგიჟდები მათზე. ძაღლების მოყვარულ ადამიანებსაც ძალიან ვაფასებ.

– ამჟამად გყავთ თეთრი ბულტერიერის ლეკვი, რომელსაც სახლში ზრდით. ამჯიშის ძაღლზე არჩევანი რატომ შეაჩერეთ?

– ბულტერიერი ჩემი დისშვილის ოცნება იყო. ეს ჯიში მეც ძალიან მიყვარს. ფეისბუქზე ერთმა ბიჭმა დაპოსტა ძაღლთან ერთად ფოტო და კომენტარში ჩემი დამოკიდებულება გამოვხატე. მომდევნო კვირას მომწერა, თუ გინდა, ლეკვს გაჩუქებო. სიამოვნებით ვიშვილეთ პატარა ლეკვი, თუმცა აღმოჩნდა, რომ ჰქონდა ენტერიტი და ჯანმრთელობის სხვა პრობლემები, იყო უსმენოც. საბედნიეროდ, არაჩვეულებრივი ექიმების, ირაკლის და მაშოს ძალისხმევით გადავარჩინეთ. მათი უზომოდ მადლიერი ვარ.

– ბულტერიერი გარეგნულად მშვიდი, მაგრამ საკმაოდ ძლიერი, შეუპოვარი ძაღლია და, როგორც ამბობენ, მტკიცე მართვა სჭირდება. აღზრდისას პრობლემებს გიქმნით?

– 8 თვისაა, ტერი ჰქვია. ავუყვანეთ მწვრთნელი გია მჭედლიშვილი, უსმენო ძაღლებისთვის სპეციალური მეთოდით, ხელის მოძრაობებით უხსნის, რა მოქმედება უნდა შეასრულოს ძაღლმა. ბევრი რამ ისწავლა. ძალიან საინტერესოა, რომ უსმენო ლეკვს ხელის მოძრაობით ყველაფერი ესმის, იცის, რომ უნდა მოვიდეს, რომ ჭამის დროა, რომ უნდა დაწვეს და ა. შ.

მწყინს, ქუჩაში ადამიანები მის მიმართ შიშს და უნდობლობას რომ გამოხატავენ. ზოგი აღიქვამს როგორც საშიშ არსებას, მკვლელ ძაღლს, თუმცა ასე არ არის. ჩემი ძაღლი ადამიანების მოყვარული, ძალიან თბილი და კეთილია.

– ადამიანთა შიში ალბათ არც თუ უსაფუძვლოა. ცნობილია, რომ ადამიანების მიმართ კეთილგანწყობილი ბულტერიერი, ძაღლის სხვა ჯიშებთან შედარებით, იშვიათად იკბინება, თუმცა კბილს თუ ჩაავლებს, მისი მოცილება ძალიან ძნელია, ამით შეიძლება მსხვერპლი საშინლად დააზიანოს.

– აღზრდაზეა დამოკიდებული. ვზრდით სიყვარულით სავსე, თბილ გარემოში. თავს ვევლებით… ზედმეტად გვიყვარს იმიტომ, რომ სიკვდილის პირას იყო და გადავარჩინეთ. საშიში არანაირად არ არის, პირიქით, უთბილესი და უსაყვარლესია. ჩემს შვილსაც ახლო ურთიერთობა აქვს მასთან. ქუჩაში ნერვები მეშლება ხოლმე, რამდენჯერ მქონია შელაპარაკება ადამიანებთან, რომლებიც ისე ექცევიან, თითქოს რაღაც საშინელება იყოს! ტერი არავის ავნებს, პირიქით, ადამიანების მოყვარულია.

– სხვა ძაღლების მიმართ რა დამოკიდებულებას ამჟღავნებს?

– კეთილგანწყობილია. ჩემი მეგობრის ძაღლი სულ ჩვენთანაა. მეტისია, ტერი მეგობრობს მასთან, ერთმანეთი ძალიან უყვართ. დიდი სიამოვნებით ავიყვანდი კიდევ ძაღლს. სამომავლოდ დიდი სურვილი მაქვს, ცხოველთა თავშესაფარი გავაკეთო და ბევრ ძაღლს ვუპატრონო.

– ტერი რომ უსმენოა, ეს მის ხასიათზე ხომ არაისახება? ზნით და თვისებებით ამავე ჯიშის სხვა, სმენიანი ძაღლებისგან თუ განსხვავდება?

– არ ვიცოდით და გავარკვიეთ: თურმე თეთრი ბულტერიერის ჯიშს აქვს მიდრეკილება სიყრუისადმი. თუმცა, როგორც ამიხსნეს, ძაღლები ვერ ხვდებიან თავიანთ უსმენობას და დისკომფორტად არ აღიქვამენ.

ეს ჯიში ძალიან მომწონს, განსაკუთრებულია, არ ერთს სხვა ჯიშს არ ჰგავს. თეთრი ფერის ტერის შავი თვალები აქვს, ულამაზესია.

– ძაღლის გარდა, სხვა ცხოველიც ხომ არ გყოლიათ?

– ფისო ავიყვანე ქუჩიდან, გავასუფთავეთ, გავალამაზეთ, მაგრამ ძაღლებთან ვერ გაჩერდა და სამწუხაროდ, მისი გაჩუქება მოგვიწია… კატის ყოლა ჩემი დიდი ხნის ოცნებაა.

– ტერის რა პროდუქტებით კვებავთ?

– მხოლოდ და მხოლოდ მაღალი კლასის სპეციალიზებული ძაღლის საკვებით. გულმოდგინედ და სათუთად ვუვლით, ვინაიდან ალერგიულია და სჭირდება სპეციალური, ანტიალერგიული საკვები. ენტერიტიც რომ აქვს გადატანილი, სპეციფიკური მოვლა სჭირდება.

– სახლში ძაღლის ბეწვს როგორ უმკლავდებით?

– ვვარცხნი დღეში სამჯერ, სპეციალურ ვიტანიმებს ვაძლევთ.

– თიკა, თქვენს პირად სამყაროში რა შემოიტანა ოთხფეხა მეგობარმა?

– ბევრი სიხალისე და ბედნიერება. შემიძლია მასთან ერთად საათობით ვისეირნო და მაგ დროს ძალიან ბედნიერი ვარ.

– თქვენი ოჯახის წევრებს ცხოველების მიმართ რა დამოკიდებულება აქვთ?

– ოჯახის წევრებს ძალიან უყვართ ძაღლები და ეს ჩემთვის სასიხარულოა. ტერის პატრონად ჩემი დისშვილი, გუკა ჰყავს არჩეული. ჩემი შვილი ნინა 9 წლისაა, ყველანაირ ჯიშთან შეუძლია კონტაქტი, შიში არ აქვს. როცა ერთად ვართ გარეთ, ნინა არავის აძლევს უფლებას, ძაღლი საბელით დაიკავოს, თვითონ უნდა ატარებდეს აუცილებლად. კლინიკაში რომ გვყავდა ლეკვი გადასარჩენად, ნინა თავთან ედგა, ნერვიულობისგან ღამეები არ ეძინა… სურვილი აქვს, პატარა ჯიშის ძაღლიც ვიყოლიოთ, მაგრამ დედაჩემს უჭირს სახლის პირობებში ამდენი ცხოველის ყოლა.

– თიკა, დაკავებული ხართ, მღერით, თავადვე ამუშავებთ საკუთარ საოჯახო სასტუმროს – გესთჰაუსს… ძაღლის მოვლას როგორღა ახერხებთ?

– ძაღლის მოვლას სჭირდება ბევრი დრო და დიდი ყურადღება. ამასაც ვაკეთებ, თან სიამოვნებით. სიყვარული ყველაფერს შეგაძლებინებს.

*

PS.სმარტ პეტი გირჩევთ! გახსოვდეთ, რომ ჯიშიანი ძაღლი არ არის მხოლოდ ჯიშიანი ექსტერიერი. მოშენების დროს სავალდებულოა გავითვალისწინოთ ჯიშის მიდრეკილება სხვადასხვა დაავადების მიმართ და ძაღლების დართვამდე აუცილებელია შემოწმდეს ლეკვის მომავალი მშობლები, რათა თავიდან ავიცილოთ ის პრობლემები, რაც ზემოთ ნახსენებ შემთხვევაშია მოცემული.